( http:// )
Поделиться:

"Боже великий и непостижимый, Отче Безначальный, Собезначальный Сыне и Душе Соприсносущный, осуществуяй не сущая, спасаяй погибающыя, животворяй мертвый, творяй по воли Твоей в силе небесней и в селении земнем, и дивным Твоим промыслом управляяй всяческая! Приклони ухо Твое с высоты святыя Твоея, и приими от нас, смиренных и недостойных рабов Твоих, имже велие Твое от бед и всегубительства спасение явил еси, сердцем и усты возносимая Тебе благодарственная сия моления, исповедания и славословия. Яко не по беззакониям нашим сотворил еси нам, Господи, ниже по грехом нашим воздал еси нам. Ты глаголал еси древле сыновом израилевым, яко, аще не послушают гласа Твоего хранити и творити вся заповеди Твоя, наведеши на них язык безстуден лицем, иже сокрушит их во градех их, дондеже разорятся стены их: и мы ведехом: яко прииде глагол страшный сей на ня и на отцы наша: обаче, прещения Твоего не убоявшеся, и о милосердии Твоем вознерадивше, оставихом путь правды Твоея и ходихом в волях сердец наших и не искусихом имети в разуме и сердце Тебе Бога разумов и сердец, еще же и отеческая предания ни во чтоже вменивше, прогневахом Тя о чуждих. Ихже ради, якоже древле сынов израилевых, тако и нас объят лютое обстояние, и о их же ревновахом наставлениих, сих врагов имеяхом буиих и зверонравных. Но Ты, Господи Боже щедрый и милостивый, долготерпеливый и многомилостивый, и истинный, и правду храняй, и творяй милость в тысящи, отъемляй беззакония, и неправды, и грехи, на время малое оставль нас, милостию велиею помиловал еси, и посетив жезлом неправды наша, якоже щедрит отец сыны, тако ущедрил еси нас. Призрел бо еси на скорбь нашу и на потребление стольнаго града, в немже от лет древних призвася имя Твое, и на моления наша, яже не на наша правды уповающе повергохом пред Тобою, но на щедроты Твоя многия, Господи: и дал еси нам хребет нечестивых супостатов, воинов же наших венчал еси оружием благоволения Твоего, да от лица Христа Твоего исчезающе исчезнут, яко дым, врази Твои, любящий же Тебе возсияют, яко восток солнца в силе своей. Видехом, Господи, видехом и вси языцы видеша в нас, яко Ты еси Бог, и несть разве Тебе, Ты убиеши и жити сотвориши, поразиши и исцелиши, и несть, иже измет от руку Твоею. Темже утвердися сердце наше во Господе нашем, вознесеся рог наш в Бозе нашем, возвеселихомся о спасении Твоем. Благодарим Тя, Господи, яко наказуя наказал еси ны вмале, да не смерти во веки предаси нас. Даждь нам, Господи, память сего славнаго Твоего посещения тверду и непрестанну имети в себе, яко да в Тебе утверждени сыновним страхом и верою, и любовию, и Твоею крепостию ограждени, выну, якоже днесь, поем и славословим Имя святое Твое. Утверди благословение Твое и на верныя люди Твоя, и Дух Твой благий да почиет на них. Подаждь в богохранимей стране нашей пастырем святыню, правителем суд и правду, народу мир и тишину, законам силу и вере преспеяние. О премилосердный Господи! Пробави милость Твою ведущим Тя: но и неищущим Тебе явлен буди: еще и врагов наших сердца к Тебе обрати: и всем языком и племенем во единем истинном Христе Твоем познан буди. Да от восток солнца до запад, всеми убо языки, единем же сердцем, вси языцы восклицают Тебе гласом радования".

Добавить в блог

Ссылки | Вопрос священнику | О Рождестве Христовом | Богословие | Рождество Христово в истории России | Иконография | Рождество Христово в красках | Детская страничка | Православная трапеза | Открытки Праздника | Фотоконкурс | Фотогалереи | Медиа | Обратная связь | Источники | Обои для рабочего стола | Заставки для мобильных телефонов

© 2006—2013 Пасха.ру
Материалы сайта разрешены для детей, достигших возраста двенадцати лет Условия использования

Если вы обнаружили ошибку в тексте, сообщите нам об этом.
Выделите мышкой область текста и нажмите Ctrl+Enter.
Яндекс.Метрика